<parte hartzeak eragindako onurak>

Jarraian, enpresak droga gehiegi hartzeari aurre egiteko gogoz zerbait eginez gero zer nolako onurak lor daitezkeen aztertuko dugu.

Osasun eta Kontsumo Ministerioak argitaratutako lan batean, Espainia osoan tabakoaren kontsumoa gutxituz gero epe luzera ekonomiaren aldatik zer nolako ondorioak izango liratekeen aztertu zen (Rovira, 1989).

Ikerketa burutu zuen taldeak tabakoaren kontsumoa %10ean murriztea hartu zuen kalkuluak egiteko neurri hipotetiko gisa, eta hori horrela gertatuko balitz, enpresek aurreztuko luketen kostua 77,24 milioi eurotakoa izango litzateke, era honetan banatuta:

	36,29 milioi: lanera ez joateagatik galdutako produktibitate gaitasuna.
	40,95 milioi: lehenago hiltzeagatik galdutako produktibitate gaitasuna.

Lanaren Nazioarteko Erakundeak adierazten duenez, drogamenpekotasunei aurre egiteko enpresariak aurrera eramandako era bateko edo besteko lan sistematikoek izango duten kostu ekonomikoa drogen kontsumoaren ondoriozko istripuek, aurreratutako erretiroek eta produktibitatearen galerek eragindakoa baino txikiagoa izango da.

Enpresariak lortuko dituen onurak hauek izango dira:

	Jendea gutxiagotan geratuko da lanera joan gabe.
	Lanean istripu gutxiago izango dira.
	Produkzioa handitu egingo da.
	Laneko giroa hobea izango da, eta zigor-neurri gutxiago hartu beharko dira.
	Material eta herramintak gutxiago hondatuko dira.
	Jende gutxiago kaleratu beharko da, eta, beraz, kalteordainak eta prestakuntza ordaintzeko diru gutxiago beharko da.

Programa eraginkorrek onura baino ez dute ekartzen laneko girora, eta ekonomikoki ere errentagarriak dira enpresariarentzat.

Munduko hainbat enpresatako datuak bildu ostean, Lan Arloan Droga Gehiegi Hartzeari buruzko Nazioarteko Partzuergoak (enpresetatik sortutako ekimen bat da) ondorengoa adierazi zuen:

	Drogak direla-eta aurrera eramandako programetan inbertitutako euro bakoitzeko 5 eta15 euro artekoa da aurrezten dena.
	Arlo honetan General Motors enpresan aurrera eramaten ari diren programaren bidez, urtean 27,8 milioi euro aurrezten dituzte.
	United Airlines enpresaren arabera, drogen arloan eragiteko aurrera daraman programan inbertitutako euro bakoitzeko 16,95 euro aurrezten ditu, ustez.